DJUZÉ

SAUDI MENTAL NA KRIOLO - I

José Augusto Da Silva, keli keh nha nomi kes batizan kuel, nteni 54 anu na corpu, nkonxi mundu antis tuga bai, nconxi campia kes txada li, mah ta parci ma vida teni so keli ph mi. Djuzé, eh ci k minis ta txoman, nu pega nu bata bai.

Tudu k Djuzé tinha ta cabi na ces braços inda, ceh mudjer ku ceh fidju d 2 anu, promessas d trbdju nunka foi possivel agarras, mas farah xintis por um tempo, foi obra k eh pega nel, larga caneta ph pega canetona, es tinha fladu el ma kela era mas pizado, mah eh da conta ma peso ka era nem so na braço, na cabeça k era tudu. Sonhus dispadaçados pamodi katevi oportunidade. 

Mi dinheru nunkas es dam, tambi di alguém nunka ntoma! Trbdju eh kel poku k ta parci k nu ta cati cati, próximo anu ku fé na Diós nt ranja material ku um tempinho txoma rapaz ph bem poi beton na kelotu lado la ph oia si alguém ta disfronta. Paredi dja nu cati cati dja nu subi, Diós ta danu kel resto.

Falas di Djuzé era mansu, ph mas k vida stab ta maltratal, mi nunka n oia tantu alegria, homi katinha nem comida as vez, mah sorrizu nunka sail d rostu, eh tinha fé meh ta conseguiba, viveba um dia d cada bes i volta a garanti kel kumida.

Trimodi dja nu sta li dja eh ph nu aguenta, alguem ka pd dizisti, nteni mininu nobu, ntem k sustenta casa, kau sta runhu, mudjer sta paradu, vida ka sta fácil.

Mah Djuzé sempri tinha ces recaída, era um grogu ph concentra cabeça uns 7hr palmanhan, mas uns dos ti k sukuru fitxa. Djuzé també tinha ces lutas di pa dentu k nunka eh fla ninguem, nunka eh oia ceh pai ta txora, ceh txoraba era pó ph compensa kelotu k ka dadu dretu. Nunka eh papia dces tristezas d manera aberto, katinha tempo ph nada mas fara ph obi Djuzé ku ces liviandadis. 

Grogu kata mata minina, bh kre bh eh nocenti!! Ami nsa cansadu, nteni cabeça trapadjadu, nteni prublema riba prublema, nt trabdja dentu obra cansadu, 2 mês kata recebi, mah simé nten k poi cumida na mesa, ago um grogu oh dos k sta cabam ku bida? Nah ivita!

Djuzé, ah Djuzé! Katem nem 5 anu dretu, mininu dja bah ph skola, primera classe ka sabia nem kze keh ta fazeba. Era alegria ku preocupaçon djuntadu, kel 50 oh 40 escudo tudo dia ph da minino ph lancha, kel almoço keh peh atxa riba oh keh bem. Kel bata uns 800 escudo la "chinês", kes livros, nem eh ka kria pensa mtu txeu!

Um grogu ku mas um kuzinha, trimodi eh modi, nada kata muda! Mi desdi k nbem mundo ntom eh so pan sufri? Carrega fidju carrega mudjer, carrega casa, carrega tudu dika obi disaforu pm nk studa.
Kantu bes k djan fadiga, pista pista dpx nk paga pamodi nk tinha! Há dias nt bem d serviço, kau sukuru, rapazinhos d merda dam caçu bodi, pon faca na piskós npensa nt morri, tomam kel poku k ntinha, man nconxi um des, Kevin keh ceh nomi, Kevin di Maria. Nmanxi nkonku na ces porta ninguém ka abri, inda onti n oia ceh rapariguinha ku homi ta dixi d carro, nt perguntal pa ceh mãe eh fingi eh ka obi! Kel rapazinhu la pp alguém tem k toma cuidado kuel, djes pol dentu uns dos bes, tudo hora eh ta sai, justiça d es terra ka presta um tuston! Coitadu ta sufri na mundo.

Djuzé ntom atxa ma soluçon eh ceh grogu, ta tinha dias k ceh mudjer tinha k bah buskal moku pateta la na mercearia, gasta 500 escudo d almoço na grogu, gana mata propi. Alguém ka sabi kze k ta passa dentu ces casa, falta d kuza poi riba d mesa eh txeu, Djuzé sima k ka sta importa mas, luz ta paga luz ta cendi, ora mariadu ora mas pior. dizanimadu ku kza fazi.
Djuzé ka disisti d trabadja mah na kel condições la patron dizisti del, pagal kes 4 mês keh tinha ta debel, cobal so fedi mandal ceh caminhu. Homi malandro k ka kre trbdja dja nu ka kre, dika sta fika bedju katem nem casa, mas fara dinheru sustenta minino.

Mudjer d Djuzé subi iace camba somada, bah fika na ceh mãe pamodi kel situaçon li kata daba! Djuzé dja tinha uns mania d dal na rostu, di pintxal i d disconta raiba na minino. Assi kata daba, oh um dia eh ta matab el dentu casa, oh eh ta largaba el. Djuzé caba goh nem mesada ph fidju, minino bata dja ratxa, teni prublema na skola, material d skola dja kateni mas, situaçon dja ka sta ta da pa mas. 

Ami ntom eh so mi? Nta trabdja tudo kel tempo li ph mudjer largam inda pa pidim dinheru? Inda ontonti li nda minino 1500 escudo, si ka sta txiga ami nka sabi modi nt fazi!

Mah Djuzé keli eh kzé Djuzé? Keli eh pamodi?

Mi meh nt pergunta, pamodi k Diós tenen si? Mariado!

Djuzé nunka konsigui poi kel beton, rapaz dal so pa dodu mah també dinheru material nunka eh ranja na verdadi! Pista pista ka podi paga, ceh mudjer djudal uns tempos, mah grogu kata dexa Djuzé pára nun kau ketu. Djuzé ku ceh grogu, dodu d cabeça! Ah Djuzé! Kenha k ka konxel dret ta fla ma cabeça bai pamodi mudjer largal! Kenha k sabi dceh história sabi ma ka foi sempri si, li na Praia es fla ma cabeça ka stal dretu, Trindade nunka eh bai, acompanhamento nunka eh tivi mas farah procura pa tem.

Lugar d dodu? Ami? Nah invita! Ami nsa dret, anhos tudo kussa nhos fadiga! Um grogu meh! Trindade eh ph dodu, ami nk dodu nk di Fogo. 

Djuzé nunka tivi apoio, Djuzé sempre tive kuel tudo kel dor d abandono. Ceh pai nunka dal atençon, vida nunka korrel moh, trbdju dretu k ta da sustentu nunka eh atxa! Nhaguenti forti Djuzé fronta, inda eh sta lida ku minis k hoji ta txomal d dodu, sta flal meh straga ceh vida, meh ta rabenta dinheru na bebida, meh frustra ku mudjer i ceh ida.

Ah Djuzé, buh flab ma era um grogu meh!

Kzs rabida, cabeça ka fria! Família nunka mas eh tive, ceh mudjer kansa ku ces mania! Di mania a vício, kredu avemaria. Djuzé fika kata konxe kata konxedu. Inda tevi um dia, k quase eh dadu um tiro, eh cumeça ta mexi na kel k eh ka dcel, minis ku fomi i ódio kata perdoa nem kara, nem idade, eh keli keh realidade!

Vida abandonal oh el k abandona vida, sinceramenti Djuzé ka sabia! Ta entra ces 60 sem ninguém, mah kzs kumeça la ph tras si eh k buh ta lembra bem. Homi forti eh kel k ta da i kata txora, era exactamente kela keh prendi, eh xinti ceh mundu ta disaba i nunka na vida eh soube fala sobre tenel.

Djuzé...Anu entra anu sai, fronta aumenta i nada ka bai. Foi lá na um kantu kes atxal, corda na piskos, tristeza ka stab mas, es fla ma spritu sai, vida caba la mah alegria bai, antis mesmo d eh poi corda na piskos.

Ah Djuzé, pamodi k buh bai!

Djuzé,

Djuzé!

Navvab A. Danso